Stappe neem
.
My lyf,
dink die volstruis,
sal ek van hier tot daar
kan bring,
deur een voet voor die ander
te sit;
maar ek moet dit dóén.
.
Deur my vier voete
stil soos ’n dooie vuur
te beweeg
oor die krakerigheid
van dooie blare,
gaan ek naby daardie tarentaal kom,
dink die tierboskat.
Dan gaan ek hom eet.
.
So vinnig flits my vier bene,
jy kan dit amper nie sien nie,
skiet ek by die skuiling in,
dink die veldmuis,
en luister na sy trillende hart.
.
My lyf,
dink ek,
sal ek van hier tot daar
kan bring,
deur een voet voor die ander te sit;
maar ek moet dit dóén.
.
Wil ek?
Dit is so veilig hier.
Maar ek moet.
Voete kan ’n rukkie staan
maar kan nooit
ophou loop nie.